Janine’s erschti SAC – Schitour - eifach mit der Chrischtine (gschei was wöu!).
So mängisch hani vo de SAC-Gantrisch Mittwuch-Schitoure gschwärmt, dass d Janine het gfunde, da würd sie o gärn derby si u drum isch sie uf Afang 2015 däm Club biträte. Füre 21. Jänner – ändlech hets Schnee u dr Wätterbricht isch guet – isch de die erschti Mittwuch-Tour vo däm Jahr mit em Ziel Diemtigtal agseit gsi.
Im Mail vom Fritz Jenni schteit: “d Schwarzeburger träffe sech z Schwarzeburg am Bahnhof u für d Bärnerinne (Janine, Annina u Chrischtine) isch der Träffpunkt 8.45 bim Bahnhof Bäup, Witerfahrt vo dert im Outo vom Trudi”. D Janine u ig telefoniere am Zischtig Abe no u i gibe letschti Tipps: Warmi Häntsche (Janine: “hani keni, bringsch mer es Paar mit?”), Sunnebrüuä u Sunnecrème… (“uh hätti vou vergässä!”). I wohne im Momänt z Grüenematt u cha drum bequem mit dr S44 (Grüenematt – Bärn – Bäup – Thun) diräkt nach Bäup reise. D S44 chunnt 8.11 z Bärn a u fahrt ei Minute schpeter witer. D Janine meint, dass 5 Minute schpeter ä nächschte Zug vo Bärn nach Bäup ungerwägs sigi – das würd ou no längä – aber de müessti umschtige… (das hätt mer im Ändeffekt öppis erschpart!). Mir beschliesse, dass ig de z Bärn useluege u falls ig d Janine gseh “okay” u süsch gseh mer üs de z Bäup. Am nächschtä Morgä weckt mi der Wecker vom Handy (I ha I mim Exil süsch kene) u ig schautes no churz i: ke Nachricht! Auso schautis aus Nid-Handy-Fan u dermit fasch “Exotin” grad wider us. Zäh ab Sibni verlohni z Hus, nid ohni no z luege, ob öppe no öpper ufem Feschtnetz het wöuä alütä.
Im Zug döseni vor mi härä u gniesses zwüsche düre, dass ig äuä eini vo de einzige bi, wo nid zur Arbeit fahrt. Z Bärn stigä massehaft Lüt us u am Schluss ou ig churz für z luege ob irgendwo d Janine z gseh isch. Ja, die chunnt doch äuä ender ersch mitem nächschtä Zug u drum stigi wiedr y. Doch ghöri rächt? Hani usem Lutsprächer Summer ghört?? De ertönt die Schtimm no einisch: “Chrischtine Summer – bitte usstigä, d’Janine Desarzens wartet uf öich!”. Werum usschtigä? geits mer dürä Chopf, doch Zyt zum überlege gits keini… I packe der Schuehsack u vore bir Tür mini Schi u scho schtohni im wahrschtä Sinn vom Wort “chli näb de (Schi-) Schueh” ufem Perron usse.. D Tür schliesst sech u der Zug fahrt ab. I däm Momänt realisiereni, dass mi Rucksack nid isch mitcho. Jetze wärs doch einisch guet, z Handy chönne izschaute, aber das isch im Rucksack! Ä Momänt schpeter schteit d Janine vor mer u seit: “Chrischtine, du söttsch villech aube dis Handy ischaute, mir müesse ufe Lötschbärger!”. Ig bi immer no ganz verdatteret u sägä verzwiflet: “Janine, mi Rucksack isch no im Zug!” Mir beschliesse unde bim Info-Schauter ga z frage, obs müglech isch, dass z Thun öpper mi Rucksack usem Zug nimmt. “Nei das geit nid”, seit die Dame dört, “aber dir chöit ä Vermisst-Mäudig usfüue”. Nei, im Momänt nützt mer das nüt, ig bruche mi Rucksack gli einisch oder de für hütt nüm. De het d Janine ä grandiosi Idee: “chum mir fahre mitem Interlakner-Zug 8.34 ab Bärn nach Thun, de heimer 5 Minute Zyt füre Rucksack z hole bis de dr Lötschbärger z Thun itrifft. Faus d S-44 vorhär achunnt. Ja, d BLS hett optimau planet, d S-44 steit insgesamt 7 Minute z Thun u zwar genau während üsem Zytfänschter. Doch zersch gohni jetze no mis Velo goh bschliesse, seit d Janine. Sie het sich ursprünglech gfröit gha, dass sie lenger Zyt het zum zmörgele u de het sie realisiert, dass ig die Fahrplanänderig äuä nid ha mitübercho u sie het sich uf ds Velo gschwunge u isch so schnäu wie müglech a Bahnhof cho. I löse afe äs nöis Billie u wo d Janine zrüggchunnt, macht sie das o u de heissts los, dassmer dä Vieredrissger verwütsche. Chum sitze mer im Zug suecht d Janine ihres Billie….”Chrischtine, i ha mis Billie nid usem Outomat gno, ig muess wieder use”….und wägg isch sie. Gseh mir üs ächt hütt no?, geits mer düre Chopf….ja, sie wird de mitem Lötschbärger cho. Ig überlegemer de während der Fahrt, wieni z Thun zu mim Rucksack wirde cho. Woni z Oschtermundige gwohnt ha, bini meischtens z Thun uf d S-1 uf Gleis 4 umgstigä, gägenüber isch jewilä dr “Gürbetaler-Express” I de Startlöcher gsi. Natürlech stohni scho früeh bim Usgang, stigä als erschti us u renne mit em Ziel Gleis 5 los. Är isch läng dä Zug…. eifach die linggi Sitä vor Gepäckablag absueche, isch mis Motto. Woni istigä gsehni als erschts ä BLS-Mitarbeiter wo Ghüderchüble läärt….”heit dir ä rote Rucksack gseh”, frogene. Är dütet uf si Rügge….är isch scho dranne gsi das “Corpus delicti” usezträge. “Ou, dä ghört mir, härzleche Dank”! sägeni u scho geits Richtig Gleis 1, wo nächschtens dr Lötschbärger wird acho. Und wär hüpft dert use? D Janine! Jetze gilts nume no i richtig Zugteu izstigä, nämlech i dä wo is Simmetal fahrt. Das schaffe mer locker u ds Poschi bringt üs de nach Zwüscheflüeh, wo üs d Schwarzeburger mit dr Bemerkig: “Momou dir heit aui d Fahrplanänderig mitübercho” ( u de wie!!), begrüesse. D Janine het mer de no verzeut, dass sie z Bärn äs nöis Billie heig müesse löse u wo sie scho fasch wieder ufs Perron isch gspurtet gsi, het sie gmerkt, dass sie dasmou d Schi bim Outomat vergässe het. Mit zwöimou wüchentlech Volleyball-Training isch ou das “locker” z schaffe u d Janine sitzt sogar no chli z früech im Lötschbärger. Mir si de mitere Biuderbuech-Schneelandschaft, schönschter Ussicht u Pulverschnee belohnt worde. Bim Abschieds-Drink z Oey-Diemtige isch de d Frog uftoucht, wie me ä Lokfüehrer derzuebringt ä Durchsag z mache. Eidütegi Antwort: Dr Janin ihre Charme! Tüet öich jetze wägedessi nid grad massehaft für d Mittwuchtoure amäude, mir si nämlech froh dert ä “Startplatz” z ha.
Härzleche Dank a Fritz u aui andere Toureleiter, wo üs immer wieder wunderschöni u ussergwöhnlechi Tourä ermügleche!
Janine Desarzens, Christine Sommer
⇐