Bundstock 2756 m.ü.M ab Griesalp 1409 m.ü.M
Ig brichte öich uf Bärndütsch vo dere wunderbare Früehligstur.( wüu i lise grad dr Bärner Fuuscht vom Marcus Pfister- empfählenswärt ) Früech simr uf, die erschti Schlüssuschteu isch scho bim ufefahre uf die Griesalp gsi. Dr Geru het sit langem widermau müesse schaute u kupple mit Sandras Outo u isch tiptop dür das änge Schträssli uf. Am haubi achti simr los gloffe. Dr René het fasch chli gjuflet u gli heimr uf dSchi chönne wächsle. Sisch gäbig dsdüruf. Öppe ir heufti heimr ame gäbige Ort d Harschise drufta. Da bini pärsönlech ja immer ganz glücklech drüber. U de heimr de feiechli schtotzig gschpitzcherelet e Momänt lang. När höch am grosse Chemp entlang traversiere u nachhär ufe i Sattu u no bis ufe uf dä schön Bundstock.Die letschte Meter simr no Zfuess ufe. Ds Panorama mit der Blüemlisaup hingerdrann u dä Blick ufe Öschinesee abe isch fantastisch gsi. Vom Wätter hani no nid vrzeut. Schön blaue Himu, am Morge no früsch u när gli richtig warm. Mir si vor de zwöufe dobe acho, grad wie ir Wätterprognose vorusgseit si de paar Quellwuuche ufcho.
Nacheme Sändwtisch u chli Schoggi simr planmässig o wider id Abfahrt. Obe ischs mängisch noch schtückliwis chli hert gsi. Aber gli isch dr Früehligssulz verlässlech worde u es het wit meh aus 15 schöni Böge gä. Mir hei richtig lang chönne abekurve. Gäge Schluss ono dür d Blüemli uf de geng lückehaftere Schneebitze. Das aus het natürlech Durscht gä u ds Rivella/Schorle/suure Moscht isch uf dr Sunneterrasse vor Griesalp bsungers fein gsi. S isch eifach e schöne Gupf dä Bundstock u d Landschaft dert obe richtig magisch. Danke viu mau.
Tourenbericht: Susanne
⇐
