Zytig geits los, vo Iseflueh fahremer mit ere autmodische, sympathische Seilbahn mit Hung u Chegu u Sack u Pack uf Sulwald –
dört mache mer e churze Bislihalt –
u loufe de los…
Eiger Mönch u Jungfrou –
im blau-gäube Morgeliecht –
wie verzouberet, eifach tou!
Zügig geits ueche –
Schnee muess me nid sueche –
(u bim Schii buggle flueche) –
Wie angeri Jahr…
Derfür stigt dr Puls bis uf di schöni Alp Suls…
Es git none Steilhang z überwinde –
Die Gschwinde –
Näs locker vom Hocker …
Ig ha eis e chline Stocker
bire bsungers steile Spitzchehri –
Hinger mir si luter fairi,
liebevolli u geduldigi Tüürler
gäh mer mentali u praktischi Ungerstützig:
Wäre mini Hüft chli jünger –
(u mini Taille chli dünner)
Giengs mit däm Trick wie im Schwick –
Hokus Pokus u forever young?? Ts, ts, ts…
Mit mentalem Fokus –
schaffis de plötzlech.
Gli simer dobe uf dr Höje Sulegg (2413 m)
Es schmälers Grätli, drum gli wieder wegg –
Mittagshaut machemer witer unger…
Mou, jitz heimer doch afe Hunger –
Mir chöi ne hie stille u derzue bestens chille
bi prächtiger Ussicht u strahlender Sunne.
Was für ne Tag – s’ isch eifach gspunne
schön u fantastisch!
Bir Abfahrt via Gumma
isch dr Schnee mängisch weich u mängisch chli tricky.
När gits no ne mickrige Gägenufstieg
Teil Zunge hange afange…
Mir chöi se gli netze, bim Beizli, da bsetze
mir mindistens d Häufti vo de Stüehl…
Ahh, wie herrlech, ds Rivella schön chüehl!
Cool isch o d Abfahrt via Schlittuwäg zur Talstation Isenflueh – Schnee isch guet u hets emu gnue.Zum Schluss nones riesigs Lob unes härzlechs Merci a üsi wunderbare, umsichtige Toureleiter/inne! Äbefaus gnosse hani die tolli, hilfsbereiti u ufgsteuti Truppe – e cooli Gruppe!
Tourenbericht: Helen Lanzrein
⇐
