Am Fritig Morge hei sech der Markus, ds Hanni und ig ufe Wäg ids Wallis gmacht. Ds St. Luc isches de scho grad bouzgredi obsi gange. När hei mer glii der Chemin des Cascades erreicht. E wunderschöne Wäg düre Waud uuf, entlang amene Fluss und paar Wasserfäu.
När witer amene Bach entlang mit ere üppige Vegetation, über Weide u schliesslech wider sträng obsi uf üse Tagesbärg, der Toûno, mit stouze 3017 Meter.
Vo dert uus het me e grandiosi Rundumsicht uf Walliser und Bärner Alpe. O ds Ziel vom nächschte Tag hei mer dütlech vor Ouge ghaa.
U de isches der gliich Wäg zrugg gange zu der Cabanne Bella Tola mit liechtem Aastieg der Hütte entgäge.
Ir Hütte hei mer de mau Ligistüehl i Beschlag gnoo und no einisch die wunderbari Ussicht gnosse. Derzue heimer no Wätter-Apps gsträälet für ds luege was der nächscht Tag söu bringe. Es het wättertechnisch gut usgseh…
Nach eme feine Znacht: Magroone mit Chäs u Späck im Fonduecaclon hei mer de üses Zimmer bezoge. Scho fasch luxuriös: mir drüü imene Zwöuferschlag. Mir hei auso meh aus gnue Platz ghaa.
Am Morge hei mer de üsne Ohre zersch nid so rächt wöue troue…es het nach Räge tönt! Und es het nid nume dernaa tönt sondern het grediache gschiffet! Das het zersch grad chli uf ds Gmüet gschlage und Frage zum Wätterbricht ufgworfe wo doch am Abe vorhär no so guet usgseh het. Aber nachdäms wider chli uftaa het simer gstartet Richtig Bella Tola mit 3025 Meter.
Der Markus het de ds Wätter ungerdessi a mi delegiert ghaa wiu er de Apps äuä nümme so rächt trouet het. I ha mis beschte gää u ha gseit es wärd de mau chli nass aber d Sunne chöm de scho no…
Ufem Wäg zum Gipfu het me zwar nid der Huuffe gseh, aber es isch gliich schön gsii. Ufem Gipfu isch de no der aakündet Räge choo, aber zum Glück nume churz. Bim Abstieg hei mer de paar Schneefäuder müesse bzw. dörfe umgaa. Die Kraxlerei het nämli no gfägt!
Vor Landschaft hät hätte me auso zersch chönne meine me sig ufem Mond. När isch es ging wie lieblecher worde u witer dür Wacholder u Heitistude. Ging begleitet vomene Bächli wo näbe üs här gurglet het. Dernaa heimer der Geteilte See erreicht wos de o wider warm isch worde u nume no paar Näbuschwade überem Bode desume geischteret si.
Leider heimer bim Blick zrugg üse Gipfu ging no nid gseh. Die Bella Tola het sech witerhin im Wulchekostüm versteckt.
Mir si de zügig in Oberems aachoo u hei nis ufd Heireis gmacht.
Der Markus het e wunderschöni Tour usgsuecht u zum Glück o düregfüehrt. Es isch e Gägend wo landschaftlech einzigartig und abwächsligsriich isch.
Schad isch nume, dass sech nid meh Lüt aagmäudet hei…So viu Mitglieder het üse SAC u schlussemänd simer nume ds dritt gsii…
Ds Hanni und ig heis derfür umso meh gnosse wiu mir hei ja de quasi e private Füehrer ghaa.
U die wo nid si mitchoo si haut säuber tschuld. Si hei e kuuli Tour und zwe wunderschöni Tage verpasst!
Sandra Muster
⇐
