Obsi-nidsi-rund-ume-Gantrisch-Wittwuch-Schiitour
Zersch wetti mau grad afe der Fritz mit der Guldige Lawineschufle uszeichne. Das sicher im Sinn vo aune wo si derbi gsii und meh derzue de im Bricht.
Nachdäm aui Teilnähmer si zämeramisiert gsii, isch es churz vor de achte bir ungere Gantrischhütte los gange. Es isch knackig chaut gsii, auso eigetlech nid so schlimm, aber me isch sech das haut nümme gwanet wius bi üs unger afange so warm isch.
Item, es Windfähndli am Gantrisch het de scho mau aakündet was üüs im Ufstieg no erwartet. Tatsächlech isch de gäge Morgetepass zue die Bise ziemli garschtig losgange. Usgseh hets schön wenn der Wind der Schnee über die Grätli u Kante übereblaase het und vor Sunne isch beschune worde. Wie der Schnee ir Sunne krüselet het.
När aber, läck bobi, si da aube Windböe choo, dass es eim fasch umghoue het. När isch der Morgetepass choo…u dä isch nid gäbig gsii. Wenn der Fritz nid gschuflet u gschuftet hätt de wär me äuä no schlächt uchechoo. Zmigscht ig hätt äuä de d Schii müesse abzieh u irgendwie so uche müesse chnorze.
Merci Fritz no einisch für dini super Leischtig!
När isches witer ufe Schibespitz u dert het de die Bise o langsam naaglaa. Fääli wäg, überne Wächte uus u nidsi Richtig Chessu. Mir si zimli wit ache u dert hets e chlini Pouse gää. Fääli wider druuf u witer isches links uche ufe Chessugrat, Fääli wider ab u wider i Chessu ache aber nid so wit wie ds erschte Mau. Dert heime chli e lengeri Pouse gmacht, aber Fritz het gmeint, es paar Nüssli söu me de no spare so vo wäge wie mängisch dass es no obsi-nidsi chönnti gaa.
Witer isches de ufe Leiterepass gange, vo dert wider nidsi u när wider obsi ufe Kameuhoger. Der Name het dä Hoger vo Fritzes 50gischtem Geburtstag woner mit aute Schii und eme Kameu isch dobe gsii. Auso nid es richtigs Kameu sigs gsii, hei mer üs la brichte.
Geschter isch kes Wüeschteschiff derbi gsii, auso mou, der Fritz het gmeint är sig mängisch chli es Kameu.
Vo dert wider nidsi zur Wasserscheidi u när der Strass naa bis zur Hütte zrugg.
So hei mir glücklech u mit paar Höhe- u Kilometer ide Wadli die Umrundig vom Gantrisch beändet. Vom Wätter här isches top gsii ussert die paar Windstöss, aber das het ja nume e churze Momänt duuret. Dernäbe isch Sunne pur gsii u kes Wüuchli am Himmu. U dass es nid so cheibe warm isch gsii, isch ja no gäbig gsii. Schnee hets chli vo auem ghaa. Viu Pulver, mau hert, mau weich u gäge Leiterepass no chli Sulz.
Merci Fritz für die schöni Tour.
Derbi gsii si Friz u Theres, Reto, Rita, Barbara, Hanni, Marianne und ig.
⇐
