Tourebricht, Drükönigstour ufe Mariannehubel
Mit Ussicht ufene Näbutour hei mir üs ds 9te-höch vom Senggibach richtig Mariannehubel ufe Wäg gmacht. U wi dr Näbu nid gnue wär, hets o nid grad üppig Schnee gha. U so si scho die erste Zwifu ufcho, ob äch de d`Schii einigermasse heil obeache chöme. Ömu di schööne nöie gäuJ
Aber ja nu, me cha ja de o nid grad aues ha am gliche Tag.
Äbe, zersch simer ufem Strässi obsi u irgendwenn heimer rächst abgha u si ab dür d Büsch, u das di Büsch nid ds gäube vom Ei si isch de grad mau klar gsi. Hie dr Schiistäcke blibe hange, dert mitem Schii am ne Aschi iighäicht, äimort es Eschtli um d`Lafere um……..itämm, irgendwenn simer wider ufem Wäg glandet u druf blibe bis dr Wäg nüm ds gseh isch gsi. Öppe bim Pt1622. Vo dert us zersch eher flach u när de wi gwohnt im ZickZack obsi däm Mariannehubel äntgäge. U plötzlech tönts us dr Gruppe, „dert obe gsehts blau us“ (auso am Himu). Und siehe da, churzi Zyt später isch dä blau Fläck am Himu immer grösser u grösser worde, bis „oben blau unten grau“. Bi prächtigem Sunneschyn, d`Sunnebrüue u ds`Ziu vor Ouge simer däm Hubel immer necher cho. Churz ungerdranne heimer es Schiidepot gmacht u dr Räschte de no ds Fuess hingeris brunge.
Ufem Gipfu aacho, enag gratuliert, dr Rucksack ufta, öppis ds`mampfe u ds`trinke füreknüblet…….. u de dr Gipfu: packt doch dr Reto ufem Gipfu e Drükönigschueche us. Dä isch de lecker gsi! Auerdings het das Ganze e chline Haage gha. Wär dr Chünig verwütscht, darf dr Tourebricht schribe. U wär het ne gha? Ig, juheee…….Wi o immer, irgendöpper darf ne si.
Nachere usgibige Pouse hei mir üs de ufe Retourwäg gmacht u das meh oder weniger uf dr gliche Route wimer obsi si. Leider, leider simer de gli mau wider i Näbu cho u fasch wine Äntefamillie, immer mit Sichtkontakt zum vordere, nidsi zum Usgangspunkt gschiinet. Dert aacho, het natürlech dr Blick uf d`Schii nid dörfe fähle….. und siehe da, fasch kes ChräbeliJ. D Verhäutniss si besser gsi aus dases d`Schneemängi hät la erwarte.
Danke Reto für di gueti Toureleitig u dä fein Drükönigschueche.
Roger Hirschi
⇐
