U da simer de gstange, ds Gaseried, nach ere gäbige Bahn- u Poschifahrt. Üse Toureleiter, der Markus Tanner, ds Hanni, der Röschu i ig. I bi chli skeptisch gsii wägem Wätter u ha scho paar Tag vorhär dänkt: da gömer sicher nid! Aber mir si gange...zum Glück!
No schnäu bisle u de isch es losgange. Zersch afe mau eifach bouzgrediuche. När chunnt me uf nes Bödeli mit schöne grüene, runde Steine u chli witer obe wartet der heilig St. Bernhard, Schutzpatron vo de Bärggänger. När isch es richtig feusig, steinig u alpin worde. Aber ging gäbig zum louffe. Het o paar Seili drinne ghaa zum Absichere. Steine u Feusbrocke hets meh aus gnue ghaa. Es het dert niemer ufgruumt, wie der Markus träffend gseit het.
Gseh vo dere schöne Kulisse heimer nid viu, aber aues chame ja nid haa im Läbe. Ds Baregghorn het sech mau zeigt u einisch ganz churz ds Zinalrothorn. U irgendeinisch isch de die Europahütte uftoucht. Zmingscht simer nie nass worde. Es het ging chli uftaa u wider zuetaa... Aber isch troche blibe.
När hets mau Kafi u Chueche gää, ga versübere, ds Bagaasch deponiere u när Znacht. Isch sehr fein gsii. Nume, die Hütte isch zwar gäbig gläbe, aber ziemli chliin u äng. U si isch brätschvou gsii. Mir si im Masselager gsii: 10 Nase obe, gliich viu unger. U paar hei sogar no im Ässruum müesse pfuuse. Mir hei das de o wöue (wägem meh Platz) aber das hätt es Puff gää u de heimers la sii. Mir si de chli dämpft gsii mit der Vorussicht uf 20 Nase i eim Schlag, Wägem Glöif die ganzi Nacht u wägem Schnarchle u äng u so. Ud Wulldechine hei d Stimmig o nid chönne hebe. Die Cheibe biisse ja dür d Chleider düre...u stübe...När isch aber die Nacht wider Erwartige ganz gäbig gsii. Nume der Platz, wo nid vorhande isch, i dere Hütte, das isch schlächt. I hamer mau vorgsteut, wenns üüs verrägnet hätt, wo mir üsi nasse Chleider hätte chönne häretue? Niene!!! Die Hütte isch nid so schlau iigrichtet. Aber janu...
Derfür chame dusche!!! U mir hei äuä DER Rekord ufgsteut: Mir hei innert dene zwo Minute wo der Jeton häregit, ds drittehöch duschet. Guet oder?
U de isches witergange über die nöii u viu erwähnti Hängebrügg. Der Markus het verzellt, dass da ganzi Heerschaare vo Inder äxtra wäge dere Brügg dert uche gö. Mit liechte Schuehli vo Randa ufe, über die Brügg, u när wider ache. Auso äxtra wäge dere Brügg giengi iz nid dert häre. Aber si isch scho speziell: vo unger gseh schön horizontal, wenn me drüber loufft, de hanget si düre. Aber es waupelet u bambelet nüt. Fasch wie e Houzbrügg...
De isch es witer gange dür ne ganz lieblechi Gägend. Viu Lerchewäuder, chli obsi, chli nidsi, ganz gäbig bis zur Täschalp. Dert heimer hurti iikehrt. U när witer bis uf Zermatt, wobii, mir si chli ender nidsi wiu ds Wätter isch nid besser worde u es het sech e Rägefront aakündet. Die isch de o choo, wenn o i abgschwechter Form, es het eifach chli grägelet. Aber da simer scho ds Zermatt gsii.
U das cheibe Matterhorn hett sech, trotz mine Stossgebät u ging wider säge: das zeigt sech no, äbe du nid zeigt. Es het ds Gfüeu ghaa wäge üüs iz zum Gwülch use choo. I hätts mer so gwünscht vor auem für ds Hanni, wo das Hour no nie eis zu eis gseh het. Aber janu, dä Bärg wird eh überschetzt. Es git ja no angeri schöni. U ds guete derbii isch: me cha das Matterhorn no x-mau ga luege. Es louft nid dervo, gheit nid zäme u abtransportiere chames o nid eifach so.
När isches heizue gange. Mit eme zfridene Lächle im Gsicht, chli müede Bei aber häppi!!!
Merci Markus für die gueti Tour, die gueti Leitig u die vile intressante Müschterli vo mir vonang hei chönne ustuusche.
Sandra Muster
⇐
